DHAGEYSO: AMISOM oo si bareer ah u Dilay labo wiil oo Walaalo ah & Xasuuq badanna ka geystay Shabeellaha Hoose

Filed under: Dhacdooyinka,WARARKA MAANTA |

Sh/Hoose (Horumar Online) – Ciidamada Nabad Ilaalinta Midowga Afrika, ayaa Jimcihii si bareer ah Gobolka Shabellaha Hoose ugu dilay laba wiil oo dhalinyaro ahaa.

Kolonyo ay la socdeen Ciidanka Amisom oo ka amba baxay Magaalada Muqdisho, kuna sii jeeday Degmada Baraawe, ayaa waxaa la sheegay in ay ka leexdeen wadadii ay ku socdeen, iyagoona ku dilay labada wiil.

HALKAN KA DHAGEYSO WAREYSIGA SHEEKH CIISE MAXAMED

Wiilashan oo lagu kala magacaabo C/raxmaan Xasan Burad oo 17 jir ahaa iyo Cabdi Xasan Baryare oo 15 jir ahaa, ayaa waxaa lagu dilay Deegaanka Wareer-male, oo hoos-tagga Degmada Baraawe. Labaada wiil waxaa la dilay, xilli ay geela aroorsheen.

Sheekh Ciise Maxamed Nuur oo ay ehelo ahaayen wiilasha la dilay, ayaa waxaa uu Ciidanka Amisom uu ku eedeeyay in bilaa sabab, ay u dileen wiilashaasi.

Sheekh Ciise Maxamed Nuur oo la hadlay warbaahinta, ayaa sidoo kale sheegay Ciidanka Amisom in ay laayeen 70 neefka geela, oo ka mid ahaa 90 neef, oo wiilashu aroorinayeen.

Dhanka kale waxaa soo baxaya warar sheegaya in Ciidanka Amisom uu wadada dagaal ku qabsaday, intii ay ku sii jeedeen Degmada Baraawe, taasoo keentay in aargudasho kula dhaqaaqaan labada wiil.

Xilliyada qaarkood Ururka Al Shabaab, ayaa wadada u gala kolonyada Ciidanka Amisom, ee ku wajahan Degmadaasi Baraawe iyo kolka ay dibadda uga soo baxayanba.

Ciidamada Amisom, ayaa waxaa la xusuustaa in bishii October ee sanadkii 2014-ka, sidaan oo kale ay geela badan ku laayeen Deegaanka Wareer-male.

Gobolka Shabellaha Hoose, ayaa waxaa ku soo noq noqday dilalka, ay Ciidanka Amisom ugu gaysanayan dadka rayidka ah, tiiyoo aysan jirin dowlad illaa iyo hadda kala xisaabtanta waxyeelada ay u gaysanayan shacabka.

Xafiiska Horumar Online, Muqdisho
Horumaronline@gmail.com

RIIX HALKAN SI AAD U AKHRISO WARAR KALE

Close